ಭಾರಿ ಮಳೆ: ಮತ್ತೆ ಸುದ್ದಿಯಾದ ಸುಳ್ಯ ಶಾಂತಿನಗರ ಕ್ರೀಡಾಂಗಣ

ಕಳೆದ ಎರಡು ದಿನಗಳಿಂದ ಸುರಿಯುತ್ತಿರುವ ಭಾರಿ ಮಳೆಗೆ ಸುಳ್ಯದ ಶಾಂತಿನಗರ ಕ್ರೀಡಾಂಗಣ ಮತ್ತೆ ಸುದ್ದಿ ಯಾಗುತ್ತಿದೆ.
ಭಾರಿ ಮಳೆಯ ಕಾರಣ ಶಾಂತಿ ನಗರ ಕ್ರೀಡಾಂಗಣದ ದಕ್ಷಿಣ ಭಾಗಕ್ಕೆ ಹಾಕಿದ ಮಣ್ಣು ಅಪಾರ ಪ್ರಮಾಣದಲ್ಲಿ ಕೊಚ್ಚಿಹೋಗುತ್ತಿದ್ದು ಮತ್ತೆ ಸ್ಥಳೀಯರಲ್ಲಿ ಆತಂಕ ಮೂಡಿಸಿದೆ.

ಮಳೆ ನೀರು ಹೋಗಲು ಪಾತಿಗಳನ್ನು ಅಳವಡಿಸಿದ್ದರೂ ನೀರು ಈ ಪಾತಿಯನ್ನೂ ಮೀರಿ ಧುಮುಕುತ್ತಿದ್ದು ಅಳವಡಿಸಿರುವ ನೀರಿನ ದಂಬೆಗಳು ದಿಕ್ಕಾಪಾಲಾಗಿದೆ.
ಈ ಮಳೆ ಇನ್ನಷ್ಟು ದಿನ ಇದೇ ರೀತಿ ಮುಂದುವರಿದರೆ ಮಣ್ಣು ಕುಸಿಯುವ ಭೀತಿ ಎದುರಾಗಿದೆ. ಅಲ್ಲದೆ ಈ ಭಾಗದಲ್ಲಿ ಹರಿಯುವ ನೀರು ಈಗಾಗಲೇ ಇರುವ ಸಣ್ಣ ತಡೆಗೋಡೆಯನ್ನು ಕೊರೆಯುತ್ತಿದ್ದು ಇದರಿಂದ ತಡೆಗೋಡೆಗೂ ಅಪಾಯವಿದೆ. ಕೆಳಭಾಗದ ಪ್ರದೇಶದಲ್ಲಿ ಮಣ್ಣು ತುಂಬುತ್ತಿದ್ದು ಕೆಳಗಿನ ಕಣಿಗಳು ತುಂಬಲು ಕೇವಲ ಒಂದೆರಡು ಅಡಿಗಳಷ್ಟು ಮಾತ್ರ ಬಾಕಿ ಇದ್ದು ಇದೇ ರೀತಿ ಮಳೆ ಮುಂದುವರಿದಲ್ಲಿ ಅಕ್ಕಪಕ್ಕದ ತೋಟಗಳಿಗೆ ಈ ಮಳೆ ನೀರು ತುಂಬುವ ಸಾಧ್ಯತೆಗಳಿವೆ.

ತಕ್ಷಣ ತಡೆಗೋಡೆಯನ್ನು ಎತ್ತರಿಸುವ ಕಾರ್ಯವನ್ನು ಆರಂಭಗೊಳಿಸುತ್ತೇವೆ ಎಂದು ಕಳೆದ ಕೆಲವು ವಾರಗಳ ಮೊದಲು ಇಲ್ಲಿಗೆ ಭೇಟಿ ನೀಡಿದ್ದ ಶಾಸಕರು, ಸಹಾಯಕ ಆಯುಕ್ತರ ತಂಡ ಭರವಸೆ ನೀಡಿತ್ತು.