ಸುಳ್ಯ: ಅಡಿಕೆ ಕಳ್ಳತನ ಯತ್ನ, ರೆಡ್ ಹ್ಯಾಂಡ್ ಆಗಿ ಸಿಕ್ಕಿಬಿದ್ದ ಕಳ್ಳ

ಕಳ್ಳತನ ಮಾಡಲೆಂದು ರಾತ್ರಿ ಅಡಿಕೆ ಗಾರ್ಬಲ್ ಗೆ ನುಗ್ಗಿದ್ದ ಕಳ್ಳನನ್ನು ಊರವರು ರೆಡ್ ಹ್ಯಾಂಡೆಡ್ ಆಗಿ ಹಿಡಿದು ಪೋಲೀಸರಿಗೊಪ್ಪಿಸಿದ ಘಟನೆ ಆಲೆಟ್ಟಿ ಗ್ರಾಮದ ಅರಂಬೂರಿನಲ್ಲಿ ನಡೆದಿದೆ.

ಅರಂಬೂರಿನಲ್ಲಿರುವ ಕರ್ನಾಟಕ ಟ್ರೇಡರ್ಸ್ ಅಡಿಕೆ ಗೋಡೌನ್ ಒಳಗಿನಿಂದ ಮಧ್ಯರಾತ್ರಿ ಸಮೀಪದಲ್ಲಿರುವ ಮನೆಯವರಿಗೆ ಶಬ್ದ ಕೇಳಿಸಿದ್ದು ಅವರು ಏನಾಗಿರಬಹುದೆಂದು ಗಮನಿಸಿದಾಗ ಒಳಗಿನಿಂದ ಟಾರ್ಚ್ ಲೈಟ್ ನ ಬೆಳಕು ಹಾಯಿಸುತ್ತಿರುವುದು ಕಂಡಿದೆ ಎನ್ನಲಾಗಿದೆ. ಅವರು ಕೂಡಲೇ ಗೋಡೌನ್ ಮಾಲಕರಿಗೆ ಪೋನ್ ಮಾಡಿ ತಿಳಿಸಿದರು.

ಬಳಿಕ ಮಾಲಕರು ಮತ್ತು ಸ್ಥಳೀಯರು ಸೇರಿ ಸ್ಥಳಕ್ಕೆ ಬಂದು ಗೋಡೌನ್ ಶಟರ್ ಓಪನ್ ಮಾಡಿ ನೋಡುವಾಗ ಒಬ್ಬ ಕಳ್ಳ ಪ್ಲಾಸ್ಟಿಕ್ ಚೀಲದಲ್ಲಿ ಅಡಿಕೆಯನ್ನು ಸಣ್ಣ ಸಣ್ಣ ಕಟ್ಟುಗಳು ಮಾಡಿಟ್ಟು ಅಡಿಕೆ ಗೋಣಿ ಚೀಲಗಳ ಮಧ್ಯೆ ಅವಿತುಕೊಂಡಿದ್ದ. ಕೂಡಲೇ ಅಲ್ಲಿ ಸೇರಿದ ಸಾರ್ವಜನಿಕರು ಹಾಗೂ ಮಾಲಕರು ಕಳ್ಳನನ್ನು ಹಿಡಿದು ಸುಳ್ಯ ಪೊಲೀಸರಿಗೆ ವಿಷಯ ತಿಳಿಸಿದರು. ಕೂಡಲೇ ಸ್ಥಳಕ್ಕೆ ಬಂದ ಪೋಲಿಸರು ಆತನನ್ನು ಬಂಧಿಸಿ ಸುಳ್ಯ ಪೋಲಿಸ್ ಠಾಣೆಗೆ ಕರೆದೊಯ್ದಿದ್ದಾರೆ. ಬಂಧಿತ ಆರೋಪಿಯನ್ನು ಬಶೀರ್ ಎಂದು ಗುರುತಿಸಲಾಗಿದೆ. ಅಬ್ದುಲ್ ಆರಿಶ್ ಎಂಬವರು ನೀಡಿದ ದೂರಿನಂತೆ ಪ್ರಕರಣದ ದಾಖಲಾಗಿದೆ.