ಟಿ20 ವಿಶ್ವಕಪ್: ಲೀಗ್ ಹಂತದಲ್ಲೇ ಹೊರಬಿದ್ದು ಟ್ರೋಲ್ ಗೆ ಒಳಗಾದ ಪಾಕ್

ಟಿ20 ವಿಶ್ವಕಪ್ ಕ್ರಿಕೆಟ್ ಪಂದ್ಯಾಟದ ಲೀಗ್ ಹಂತದಲ್ಲೇ ಹೊರಬಿದ್ದು ಮುಖಭಂಗಕ್ಕೊಳಗಾಗಿರುವ ಪಾಕಿಸ್ತಾನ ಕ್ರಿಕೆಟ್ ತಂಡ ಇದೀಗ ಟ್ರೋಲ್ ಗೆ ಒಳಗಾಗಿದೆ. ಪಾಕ್ ತಂಡದ ಮಾಜಿ ಆಟಗಾರರು ತಂಡದ ಆಟಗಾರರ ಪ್ರದರ್ಶನದ ಬಗ್ಗೆ ಹಿಗ್ಗಾ ಮುಗ್ಗಾ ವಾಗ್ದಾಳಿ ನಡೆಸುತ್ತಿದ್ದು ಬಾಬರ್ ಪಡೆಯ ಹೀನಾಯ ಸೋಲಿಗೆ ಆಕ್ರೋಶ ಹೊರ ಹಾಕುತ್ತಿದ್ದಾರೆ.

ಅತ್ತ ಪಾಕಿಸ್ತಾನದಲ್ಲಿ ತಂಡದ ಕಳಪೆ ಪ್ರದರ್ಶನಕ್ಕೆ ಅಭಿಮಾನಿಗಳಿಂದ ತೀವ್ರ ಆಕ್ರೋಶ ವ್ಯಕ್ತವಾಗಿದೆ. ಹಲವಾರು ಮಂದಿ ಜಾಲತಾಣಗಳ ಮೂಲಕ ಪಾಕ್ ತಂಡದ ಆಟಗಾರರನ್ನು ಟ್ರೋಲ್ ಮಾಡುತ್ತಿದ್ದಾರೆ. ಕ್ರೀಡಾಂಗಣ ನಿರ್ಮಾಣ ಕಾಮಗಾರಿಗೆ ಇವರು ಲಾಯಕ್ಕು ಎಂದೆಲ್ಲಾ ಜರೆದಿದ್ದಾರೆ. ಯು.ಎಸ್.ಎ ಸೂಪರ್ 8 ಟಿಕೆಟ್ ಪಡೆದರೆ ಪಾಕಿಸ್ತಾನ ವಿಮಾನದ ಟಿಕೆಟ್ ಪಡೆದಿದೆ ಎಂದೆಲ್ಲಾ ಟ್ರೋಲ್ ಮಾಡುತ್ತಿದ್ದಾರೆ. ಅಲ್ಲದೇ ಆಟಗಾರರ ವ್ಯಂಗ್ಯ ಚಿತ್ರ ಪ್ರಕಟಿಸಿ ಆ ಮೂಲಕವೂ ತಮ್ಮ ಆಕ್ರೋಶ ಹೊರ ಹಾಕುತ್ತಿದ್ದಾರೆ.