ಅದ್ಭುತ ಬೌಲಿಂಗ್ ಮಾಡಿದರೂ ಕೆಕೆಆರ್ ತಂಡದ ರಾಣಾಗೆ ಬಿತ್ತು ದಂಡ..!
ಐಪಿಎಲ್ ಕ್ರಿಕೆಟ್ ಎರಡನೇ ದಿನ ಸನ್ ರೈಸರ್ಸ್ ಹೈದರಾಬಾದ್ ಮತ್ತು ಕೋಲ್ಕತ್ತಾ ನೈಟ್ ರೈಡರ್ಸ್ ನಡುವಿನ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡವು ನಾಲ್ಕು ರನ್ ಅಂತರದ ಗೆಲುವು ಸಾಧಿಸಿದೆ.
ಹೈದರಾಬಾದ್ ಕಡೆಗೆ ತಿರುಗಿದ್ದ ಪಂದ್ಯವನ್ನು ಕೊನೆಯ ಓವರ್ ನಲ್ಲಿ ಕೆಕೆಆರ್ ಯುವ ಬೌಲರ್ ಹರ್ಷಿತ್ ರಾಣಾ ಅದ್ಭುತ ಓವರ್ ಎಸೆದು ತಂಡಕ್ಕೆ ಗೆಲುವು ತಂದಿದ್ದರು.
ಹರ್ಷಿತ್ ಬೌಲಿಂಗ್ ಮೂಲಕ ಅದ್ಭುತ ಪ್ರದರ್ಶನ ನೀಡಿದರೂ ಕೂಡ ಅವರಿಗೆ ದಂಡ ವಿಧಿಸಲಾಗಿದೆ. ಯಾಕೆಂದರೆ, ಹೈದರಾಬಾದ್ ಆರಂಭಿಕ ಆಟಗಾರ ಮಯಾಂಕ್ ಅಗರ್ವಾಲ್ ಅವರನ್ನು ಔಟ್ ಮಾಡಿದ ವೇಳೆ ಹರ್ಷಿತ್ ರಾಣಾ ಅತಿರೇಕದ ವರ್ತನೆ ತೋರಿದ್ದು ಫ್ಲೈಯಿಂಗ್ ಕಿಸ್ ಮೂಲಕ ಅಗರ್ವಾಲ್ ರನ್ನು ಪೆವಿಲಿಯನ್ ಕಡೆ ಹೋಗುವಂತೆ ಸನ್ನೆ ಮಾಡಿದ್ದರು. ಇದಕ್ಕೆ ಅವರಿಗೆ ದಂಡ ವಿಧಿಸಲಾಗಿದೆ. ಮಾತ್ರವಲ್ಲ ಇದು ಕ್ರೀಡಾಭಿಮಾನಿಗಳ ಆಕೋಶಕ್ಕೂ ಕಾರಣವಾಗಿದೆ.
