ಮಡಿಕೇರಿ: ಲಾರಿಯಿಂದ ಉರುಳಿ ಪಿಕಪ್’ನ ಗಾಜು ಸೀಳಿದ ಬೃಹತ್ ಮರದ ದಿಮ್ಮಿ..! ಪಿಕಪ್ ಚಾಲಕ ಅಪಾಯದಿಂದ ಪಾರು
ಮಡಿಕೇರಿ: ಲಾರಿಯೊಂದರಲ್ಲಿ ಬೃಹತ್ ಮರದ ದಿಮ್ಮಿ ಸಾಗಾಟದ ವೇಳೆ
ಮರದ ದಿಮ್ಮಿ ಲಾರಿಯಿಂದ ಜಾರಿ ಪಿಕ್‌ಅಪ್ ವಾಹನದ ಮೇಲೆ ಉರುಳಿದ ಘಟನೆ ಜೋಡುಪಾಲದಿಂದ ವರದಿಯಾಗಿದೆ.
ಮಡಿಕೇರಿಯಿಂದ ಸಂಪಾಜೆ ರಸ್ತೆಯ ಜೋಡುಪಾಲ ಸಮೀಪ ಜನವರಿ 27ರಂದು ರಾತ್ರಿ 14 ಚಕ್ರದ ಲಾರಿಯೊಂದರಲ್ಲಿ ಭಾರೀ ಗಾತ್ರದ ಮರದ ದಿಮ್ಮಿಗಳನ್ನು ಮಂಗಳೂರು ಕಡೆಗೆ ಸಾಗಿಸಲಾಗುತ್ತಿತ್ತು.
ಜೋಡುಪಾಲ ತಿರುವಿನ ಸಮೀಪ ಬರುತ್ತಿದ್ದಂತೆ
ಮರದ ದಿಮ್ಮಿಗಳಿಗೆ ಕಟ್ಟಲಾಗಿದ್ದ ಹಗ್ಗ
ಏಕಾಏಕಿ ತುಂಡರಿಸಲ್ಪಟ್ಟು ದಿಮ್ಮಿಗಳು ರಸ್ತೆಗೆ
ಉರುಳಿ ಬಿದ್ದಿವೆ.
ಇದೇ ವೇಳೆ ಜೋಡುಪಾಲದಿಂದ ಮದೆನಾಡು ಕಡೆಗೆ ಬರುತ್ತಿದ್ದ ಪಿಕ್‌ಅಪ್ ವಾಹನಕ್ಕೆ ಮರದ ದಿಮ್ಮಿ ಉರುಳಿ ಬಿದ್ದಿದ್ದು ಉರುಳಿ ಬಂದ ವೇಗಕ್ಕೆ ದಿಮ್ಮಿ ಪಿಕಪ್ ವಾಹನದ ಮುಂಭಾಗದ ಗಾಜನ್ನು
ಸೀಳಿ ಹೊರಕ್ಕೆ ಬಂದಿದೆ. ಘಟನೆಯಿಂದ ಚಾಲಕ ಪವಾಡ ಸದೃಶ
ರೀತಿಯಲ್ಲಿ ಪಾರಾಗಿದ್ದು ಪಿಕ್‌ಅಪ್ ವಾಹನ ಜಖಂಗೊಂಡಿದೆ.
ಕೆಲ ಕಾಲ ಹೆದ್ದಾರಿ ಸಂಚಾರ ಅಸ್ತವ್ಯಸ್ತವಾಗಿತ್ತು. ಘಟನೆ ಕುರಿತು ಮಡಿಕೇರಿ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
