ಸುಳ್ಯ: ಆಕಸ್ಮಿಕ ಬೆಂಕಿ – ಯುವಕರ ಸಮಯ ಪ್ರಜ್ಞೆ ತಪ್ಪಿದ ಭಾರಿ ಅನಾಹುತ

ಸುಳ್ಯ ಆಲೆಟ್ಟಿ ರಸ್ತೆಯ ಗುರುಂಪು ಎಂಬಲ್ಲಿ ಕರಾವಳಿ ಗುಜರಿ ಅಂಗಡಿಯ ಹಿಂಬದಿ ನಿನ್ನೆ ತಡರಾತ್ರಿ ಸುಮಾರು 2.30 ರ ಹೊತ್ತಿಗೆ ಆಕಸ್ಮತ್ತಾಗಿ ಬೆಂಕಿ ಹೊತ್ತಿಕೊಂಡು ಧಗ ಧಗನೆ ಉರಿದು ಅಪಾರ ನಷ್ಟ ಸಂಭವಿಸಿದೆ.

ಬೆಂಕಿಯ ಕೆನ್ನಾಲಿಗೆ ಸಿಲುಕಿ ಸ್ಥಳೀಯ ಪರಿಸರಕ್ಕೆ ಪಸರಿಸಿ ಬಾರಿ ಅನಾಹುತ ಸಂಭವಿಸುತ್ತಿತ್ತು. ಅದೃಷ್ಟವೆಂಬಂತೆ ನೇಮೋತ್ಸವದಿಂದ ಆಲೆಟ್ಟಿ ಸದಾಶಿವ ದೇವಸ್ಥಾನಕ್ಕೆ ಬರುತ್ತಿದ್ದ ಕುಡೆಕಲ್ಲು ನಿವಾಸಿಗಳಾದ ಯುವಕರು ಬೆಂಕಿ ಹತ್ತಿ ಉರಿಯುವುದನ್ನು ಕಂಡು ಕಾರು ನಿಲ್ಲಿಸಿ ನಿದ್ರೆಯಲ್ಲಿದ್ದ ಅಕ್ಕಪಕ್ಕದ ಮನೆಯವರನ್ನು ಕರೆದು ಎಬ್ಬಿಸಿದ್ದಾರೆ.

ಬಳಿಕ ಅಗ್ನಿಶಾಮಕ ದಳದವರಿಗೆ ಮಾಹಿತಿ ತಿಳಿಸಿದ್ದು ಸ್ಥಳೀಯರು ಹಾಗೂ ಕುಡೆಕಲ್ಲು ನಿವಾಸಿಗಳಾದ ಕೀರ್ತಿ ಕುಮಾರ್, ವಿನೋದ್,ರಾಜೇಶ್, ಮೋಹಿತ್, ದೀಪಕ್ ಕುಡೆಕಲ್ಲು ರವರು ಸೇರಿ ಬೆಂಕಿ ನಂದಿಸುವಲ್ಲಿ ಸಹಕರಿಸಿದರು.

ಬೆಂಕಿ ಅವಘಡದಿಂದ ಬಾರಿ ಅನಾಹುತವನ್ನು ತಡೆಯುವಲ್ಲಿ ಯುವಕರ ಸಮಯ ಪ್ರಜ್ಞೆ ಬಹಳಷ್ಟು ಪ್ರಯೋಜನವಾಯಿತು ಎಂದು ಸ್ಥಳೀಯರು ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.